Madaxii Kooxda GASCO Oo Saacado Xabsiga La Dhigay..

MUQDISHO: Mid ka mid ah madaxda kooxaha Kubadda cagta ee u diiwaan gashnaa Xiriirka Kubadda Cagta islamarkaasna ka mid ahaa codeeyayaashii doorashadii guddoonka Xiriirka ahna Madaxa kooxda heerka labaad ee GASCO Aweys Cali Xaaji Dalfac (Aweys Beeleey) ayaa saacado xabsiga la dhigay iyadoo markii danbe si damaanad ah uu dib xuriyadiisa ugu helay.

Aweys Beeleey  ayaa  xabsiga  Afar Irdood ku qaatay  saacado  ka gadaal markii uu saaka garoonka Dugsiga sare ee Booliska [Scuola Polizia] oo shalay ka furmay  horyaalkii  6-aad ee Heerka labaad [Seria B] uu geeyay koox  ku ciyaaraysa magaca kooxda GASCO iyadoo  ciyaar ay ku balansanaayeen kooxaha DAALLO vs. GASCO xilligaas koox kale oo ku ciyaaraysa isla magacaas {GASCO} ay ku sugnayd garoonka islamarkaasna  ay aqoonsan tahay xiriirka Kubadda Cagta.

Aweys Beeleey  ayaa ku dooday inuu  isaga mas`uul ka yahay  kooxda GASCO balse aan koox kale ku ciyaari karin magaca kooxdiisa  wuxuu durba ku amray ciyaaryahanadii uu watay  inay garoonka  galaan oo ay iyagu ciyaaraan, Laakiin waxaa arintaasi ka  biyo diiday  maamulka ciyaarta [XSKC] oo  u sheegay in ay ciyaarayaan kooxda kale taasoo dhalisay buuq iyo gacan ka hadal markii danbe  sababtay inuu soo dhexgalo  Ciidanka Booliska oo xabsiga u taxaabay madaxa kooxdan GASCO Aweys Cali Xaaji Dalfac (Aweys Beeleey).

"Aniga kooxdeyda ayaan geeyay garoonka waxaan ku iri garoonka gala oo ciyaara wax hub ma wadan waayo kooxda GASCO waa kooxdeyda magaceyna   cid kale ma sheegan karto mana ka yeelayno" sidaas waxaa  tibaaxay Aweys Beeleey oo raaciyay inuu muddo kooban xabsiga  la dhigay laguna soo daayay  damiin isagoo  ka dhawaajiyay in lagu xiray amar Taliye iyo Wasiir.

Aweys  Cali  Xaaji  Dalfac [Aweys Beeleey] ugu baaqay wasaaradda isboortiga,GOS, FIFA, CECAFA iyo dhamaan inta jecel  isboortiga  inay  soo farageliyaan  tacadi  iyo boob uu ku sheegay inay wadaan  hogaanka xiriirka kubadda cagta oo uu sheegay in waqtigooda dhamaaday xilliganna uu yahay waqtigii doorashada guddoonka  xiriirka kubadda cagta.

Said Ibrahim Hussein [BUUNA]