FIFA Oo Sharciyada Wax Ka Badelaysa

ZURICH: Shan qodob oo ka mid xeerarka lagu maamulo kubadda cagta ayaa in wax laga badelo ka mid ah ajendaha looga hadli doono shirweynaha sanadlaha ah ee ee ay ku kulmayaan guddiga sare ee xiriirka Caalamiga Kubadda Cagta [IFAB].

Guddigu wuxuu  awood u leeyahay inuu wax ka badeli  karo sharuucda  marka  loo baahdo,  kulan la isugu yeeray inuu ka dhaco Sabtida magaalada Zurich .

Fifa  waxay danaynaysaa  ilaaliyaasha sharciyada inay ka wada hadlaan , haddii ciyaaryahan uu  sababo rigoore [Penalty] in ciyaarta laga saaro .

Qodob kale oo isna ajendaha ku jira ayaa ah Saddexda Ganaax [triple-punishment ] kasoo macnihiisu yahay haddii  ciyaaryahan  uu ka horjoogsado fursad gool lagu dhalin karay  si qalad ah in ciyaarta laga saaro  islamarkaana  ganaax la saaro , sidoo kale kubadda la dhigo goobta laadka [Penalty -  spot-kick].

Arrin kale ayaa ah marin habaabin  [feinting of run-ups]  marka rigoorada la laadayo ciyaaryahanka waxaa loo ogol yahay inuu istaago ka dib uu bilaabo, waxaa taasi iminka lagu darayo waxyaabaha ka baxsan dhaqanka isboortiga.

Doorka garsooraha afaraad  ayaa dib loo eegayaa , sidoo  kale in la  isticmaalo caawiye  garsoore oo  dheeri ah .

Madaxweynaha Fifa  Sepp Blatter  ayaa soo jeediyay in la sameeyo tijaabooyin  dheeri , lakiin wuxuu diiday codsiga ah in shan garsoore loo isticmaalo  World Cup si ay u caawiyaan  xadgudubyada ka dhaca xerada ganaaxa[ penalty area].

Cabashada lagu doonayo garsoore dheeri ah ciyaaraha  South Africa waxay kordheen markii  Thierry Henry  uu kubaddiisa gacanta  ku caawiyay  xulka France inay uga soo baxaan kulankii  Jamhuuriyadda  Ireland.

Waxaa  kale oo ay  IFAB ka doodi doonaan  in  la isticmaalo qalab casri ah oo sheegi doona xariiqa goolka  [goal -line] kaasoo ay beeniyeen xiriirada kubadda cagta ee  England, Scotland, Wales iyo Northern Ireland,mid walba wuxuu lahaan doonaa hal cod , halka  Fifa ka lahaan doonto afar.

Lix cod ayaana loo baahan yahay marka  sharci la badelayo.

Said Ibrahim Hussein [BUUNA]